ஷிண்டோ

சோகம் நம்மை
ஆட்கொள்ளுகையில்
நினைவுகளின், கவனத்தின்
சின்ன சாகசங்களால்
நாம் சில கணங்கட்கு
காக்கப்படுகிறோம்:
கனியின் சுவை, நீரின் சுவை
கனவு நமக்குத் திரும்பித்தரும் முகம்,
நவம்பர் மாதத்துவக்கத்தின் மல்லிகைகள்,
திசைகாட்டியின் முடிவிலாத் தாபம்,
தொலைந்துவிட்டதாய் நினைத்த புத்தகம்,
லத்தின மொழிப் பாவகையின் சீர்,
வீட்டைத் திறக்கும் சிறு சாவி,
சந்தனம் அல்லது நூலகத்தின் வாசனை,
ஒரு நிழற்சாலையின் பழமையான பெயர்,
வரைபடத்தின் நிறங்கள்,
சற்றும் எதிர்பாராத சொல்வரலாறு,
மெருகேற்றிய நகம்,
நாம் எதிர்பார்த்திருந்த சந்திப்பு,
பனிரெண்டு முறை இருளில் கேட்கும் மணியோசை,
நாம் எதிர்பார்க்காத உடல்வலி.
எண்பது லட்சம் ஷிண்டோ தெய்வங்கள்
நம் பூமியில் பயணித்தவண்ணம் இருக்கின்றன
பணிவான அத்தெய்வங்கள் நம்மைத் தொட வருகின்றன
தொடுகி்ன்றன, பின் சுற்றித் திரிகின்றன.

- போர்ஹேஸ்

(Translated from the English translation by Paul Weinfield)