மத்திய கிழக்கு

வானொலி அலைகளினூடே
பதின்பருவத்தில்
என் பிரக்ஞையில் நுழைந்தது
மத்திய கிழக்கு

ஏற்றுமதி வாடிக்கையாளனின்
அலுவலகத்தில் சிறையுண்ட அனுபவம்
ஏமனில் நிகழ்ந்தது

வேலையிலிருந்து துரத்தி
என் வலிமையை சோதித்தது
ஷார்ஜா ஒரு முறை

பையில் நிறைந்திருந்த
திர்ஹம்களை
மேஜையில் கொட்டி
சரக்கு எப்போது வரும்
என்று வினவிய ஜோர்டான் காரன்
பலமுறை எனை அழைத்து
என் வேலை குறித்து கேட்ட கரிசனம்

கதார்க்காரனின்
தாராள மனதை உணரக் கிடைத்தது
தம்மாம் செல்லும்
பஹரைனின் கடற்பாலத்தில்

கூடப்பயணஞ் செய்த
கோழிக்கோட்டு பெண்ணொருத்தி
அபுதாபிக்காரனை கைபிடித்த
கதையைக் கேட்டது
ஒமானிய விமானத்தில்

என் முறை வந்தபோதும்
என்னை கவனிக்காமல்
ரஸ் அல் கெய்மாக்காரனை
கவனித்துவிட்டுப் பின்னர்
எந்த ஐஸ்க்ரீம் வேணும்
என்று எதியோப்பிய விற்பனைப் பெண் கேட்டது
துபாய் மாலில்

பல நிற அனுபவப் பரிசினை
எனக்கு நல்கிய மத்தியக் கிழக்கு
நாவல்களில்
கவிதைகளில்
சமய இலக்கியங்களில்
இன்னமும் தொடர்பில் இருக்கிறது

முகப்புச் செய்தி
வாயிலாக அதை அறிய
எனக்கு விருப்பமில்லையென
எத்தனை முறை சொன்னாலும்
அதற்குப் புரிவதில்லை