இலைகள், மலர்கள், மரங்கள்

‘சமுராயும் கைதியும்’ (Kokurōjō / The Samurai and the Prisoner) என்பது ஜப்பானிய எழுத்தாளர் ஹோனோபு யோனேஸாவா எழுதி, 2021-ஆம் ஆண்டு வெளியான புகழ்பெற்ற வரலாற்று மர்ம நாவலாகும். பல இலக்கிய விருதுகளைப் பெற்ற இந்நாவல், தற்போது இயக்குநர் கியோஷி குரோசாவா இயக்கத்தில் திரைப்படமாக உருவாகியுள்ளது.

இந்நாவலின் கதை, ஜப்பானிய வரலாற்றின் திருப்புமுனை நிகழ்வாகக் கருதப்படும் ஹொன்னோஜி சம்பவம் (Honno-ji Incident, 1582) நடைபெறுவதற்கு சில ஆண்டுகளுக்கு முன்பு, கி.பி. 1578–1579-இல் நடைபெற்ற அரியோகா கோட்டை முற்றுகையை (Siege of Arioka Castle) வரலாற்றுப் பின்னணியாகக் கொண்டது. அது ஜப்பானின் செங்கோகு காலம் (Sengoku Period). அக்காலத்தில் பல சக்திவாய்ந்த சமுராய் போர்த்தலைவர்கள் தங்கள் ஆட்சியை விரிவுபடுத்தும் நோக்கில் இடையறாத போர்களில் ஈடுபட்டிருந்தனர். ஜப்பான் முழுவதையும் ஒரே ஆட்சியின் கீழ் கொண்டு வர வேண்டும் என்ற பேராசையே அந்தப் போர்களின் அடிப்படை நோக்கமாக இருந்தது.

இந்தக் கதையின் பின்னணியில் அக்கால ஜப்பானின் மத, சமூக, அரசியல் முரண்பாடுகள் முக்கியப் பங்கு வகிக்கின்றன. சமுராய் ஆட்சியாளர்கள் பல்வேறு பௌத்த மரபுகளையும் ஷின்டோ வழிபாட்டையும் பின்பற்றியிருந்தாலும், ஜென் பௌத்தம் (Zen Buddhism) அவர்களிடம் குறிப்பிடத்தக்க செல்வாக்கைப் பெற்றிருந்தது. தியானம், தன்னடக்கம், ஒழுக்கம், மரணத்தை அஞ்சாத மனநிலை ஆகியவற்றை வலியுறுத்திய ஜென் சிந்தனை, சமுராய் வாழ்க்கைமுறையோடு இயல்பாக ஒன்றிணைந்திருந்தது.

அதே நேரத்தில், பொதுமக்களிடையே ஜோடோ ஷின்ஷூ (Jōdo Shinshū அல்லது True Pure Land Buddhism) மிகுந்த வரவேற்பைப் பெற்றிருந்தது. அமிதாப புத்தரின் கருணையை நம்புவதும், அவரது நாமத்தை பக்தியுடன் உச்சரிப்பதும் (நெம்புட்சு) முக்திக்கான வழி என்று இந்த மரபு போதித்தது. சமூக அந்தஸ்தோ, துறவறப் பயிற்சியோ அவசியமில்லை என்ற அதன் எளிய கருத்து, விவசாயிகள், வணிகர்கள், சாதாரண மக்களைப் பெரிதும் ஈர்த்தது.

இந்தச் சமயப் பின்னணியிலிருந்தே இக்கோ-இக்கி (Ikkō-ikki) எனப்படும் சக்திவாய்ந்த மக்கள் இயக்கம் தோன்றியது. ஜோடோ ஷின்ஷூ மரபைச் சார்ந்த விவசாயிகள், பௌத்தத் துறவிகள், வணிகர்கள், உள்ளூர் நிலப்பிரபுக்கள், சில சமுராய்கள் ஆகியோர் இணைந்து இந்த இயக்கத்தை உருவாக்கினர். காலப்போக்கில் அது மத இயக்கம் என்ற எல்லையைத் தாண்டி, சமூக-அரசியல் எதிர்ப்பு இயக்கமாக வளர்ந்தது. குறிப்பாக ஓடா நோபுனாகாவின் மையப்படுத்தப்பட்ட ஆட்சியையும், நிலப்பிரபுக்களின் ஆதிக்கத்தையும் எதிர்த்து பல இடங்களில் ஆயுதம் ஏந்திப் போராடியது.

ஜென் பௌத்தமும் ஜோடோ ஷின்ஷூவும் புத்த மார்க்கத்தின் இரு வெவ்வேறு மரபுகள். இருப்பினும், அவற்றுக்கிடையேயான இறையியல் வேறுபாடு மட்டுமே அக்கால மோதல்களுக்குக் காரணமாக இருக்கவில்லை. அரசியல் அதிகாரப் போட்டி, நிலப்பரப்பின் மீதான கட்டுப்பாடு, பொருளாதார நலன்கள், சமூக அதிருப்தி ஆகியவை மத அடையாளங்களோடு பின்னிப் பிணைந்து, செங்கோகு கால ஜப்பானை நீண்டகால உள்நாட்டுப் போர்களில் ஆழ்த்தின. அந்தச் சிக்கலான வரலாற்றுச் சூழலையே சமுராயும் கைதியும் விறுவிறுப்பான வரலாற்று மர்மக் கதையாக உயிர்ப்பிக்கிறது.