ஒர் ஆப்பிளும் ஆறு விதைகளும்

பழத்தில் உள்ள விதைகளை

எண்ணுதல் எளிது.

விதைக்குள் இருக்கும் பழங்களை

எண்ணுவது எப்படி?

+++++

அறுத்துவைத்த ஆப்பிளுக்குள்

இருந்த விதை ஆறு !

பத்திரப்படுத்தி வைத்திருந்த

விதைகளைக் கவர்ந்ததாரு?

என்னிடமிருப்பது ஒரே ஒர் ஆப்பிள்.

விதைகளை கொண்டு தாரும் !

கடைசி ஆப்பிளை தரவும் சம்மதம்.

விதையிருந்தால் போதும்.

+++++

காணாமல்போன விதைகளைத்தேடி

கானகம் வரை வந்துவிட்டேன்.

நிறைய மரங்கள் !

என் வீட்டிலிருந்து

களவு போன விதையிலிருந்து

எந்த மரம்

முளைத்தது?

யாராவது சொல்லுங்கள் !

+++++

அழிவும் உருவாக்கமும்

நானூறு மெல்லிய கதிர்கள்
ஒருங்கிணைந்து
ஒற்றைக்கதிரானது.
திண்மை பெருகி
ஒளியின் உக்கிரம்
ஆயிரம் மடங்கானது.

நேர்க்கோட்டில் பயணித்தது கதிர்.
எதிர்வந்த திடப் பொருள்கள்
கிழிந்தன.
திரவப்பொருள்கள்
கொதித்தன.
ஏழைச்சுவர் ஒன்று
அதன் பாதையில் வந்தது.
சுவர் செங்குத்தாக
இரண்டு பட்டது.
சுவர் உடைந்ததில்
செங்கல் துகளோன்று
மண்ணில் வீழ்ந்தது.

சில நூறு வருடங்களில்
சுவரிருந்த இடத்தில்
ஆறொன்று ஓடத்துவங்கியது.
ஆற்று நீரின் அரிப்பில்
இரண்டாக உடைந்திருந்த சுவர்
முழுதும் அரிக்கப்பட்டு
அடித்துச்செல்லப்பட்டது.
செங்கல் துகள் மட்டும்
அரிப்புக்குள்ளாகாமல்
நீரால்
தள்ளிக்கொண்டு போகாமல்
தரையை இறுக்க பற்றிக்கொண்டு ஜீவித்திருந்தது.
தனிமைப்பட்டுப்போன துகளின்
வாழ்க்கை போல
ஆறும் ஒருநாள் வறண்டு போனது.
ஆறோடிய படுகை
பாலை போலானது.
நீர்த்தாவரங்களெல்லாம்
வாடி கருகின.
காட்டுப்பகுதியில்
எழுந்த தீயில்
வாடிய நீர்த்தாவரங்களும்
எரிந்து
ஒற்றை செங்கல்துகள்
நீறு பூத்தது.

அண்டவெளியிலிருந்து
இறங்கிய கதிர்க்கோடொன்று
சுவரிருந்த ஆற்றுபகுதியை
தாக்கியபோது
நீறு பூத்த துகள்
தீயாகி
பின்னர் துணை அணு
ரூபங்கொண்டு
கதிர்க்கோட்டின்
அங்கமானது.

ஒளி வடிவில்
புனர்ஜென்மம் பெற்ற
முன்னாள் செங்கல் துகள்
சென்றபாதையில்
தென்பட்டவற்றையெல்லாம் –
சில ஏழைச்சுவர்களையும் சேர்த்து –
கருக்கி, பஸ்மமாக்கி
காற்றின் வேகத்தில்
விரைந்தது.

நிழல் விமானம்

வெண் திரைத்துணியில்
கருஞ்சித்திரமாய்
நகர்ந்து கொண்டிருந்தது
நிழல் விமானம்
பச்சை வயல்கள்,
மணற்பரப்புகள்,
தொழிற்சாலை கூரைகள்..
எல்லாவற்றின் மீதும்
கருநாகம் போல ஊர்ந்து சென்றது.
தந்தை கைப்பிடித்து
குதித்து குதித்து நடக்கும்
சிறுவனின் உற்சாகம்.

பிரம்மாண்டமானதொரு
நீர்ப்பாசன கிணறொன்றில்
பாய்ந்தபோது
நிழல் விமானம்
மறைந்துபோனது.
சகபயணியொருவர்
பயணத்தில் காணாமல்போனால்
உண்டாகும் பதைப்புடன்
பார்வையை
சுழலவிட்டேன்.
கருமேகங்கள் சூழ்ந்திருந்தன.
கதிரவன் ஒளிந்திருந்தான்.
போதுமான ஒளியின்மையால்
நிழல் விமானத்தை தேட முடியவில்லை.
மேகங்கள் விலகி
சூரியன் மீண்டும் வெளிவந்த
சில நொடிகளில்
அதிர்வின்றி
தரையை தொட்டது விமானம்.

முட்டிமோதி
படியில் இறங்கி
பேருந்தில் அமருமுன்
நிழல் விமானத்தை மீண்டும் பார்த்தேன்.
எவ்வித அசைவுமின்றி
ராட்சத அளவில்
அமைதியுற்று நிற்கும்
விமானத்தின் அடியில்
நிம்மதியாக உறங்கிக்கொண்டிருந்தது
நிழல் விமானம்.

உண்மை ஓர் பிரச்னை

உண்மை

ஒர் பிரசினை.

இரக்கமற்றது.

நிம்மதியை குலைப்பது.

எல்லா பக்கங்களிலும்

நம்மை வளைத்து

என்ன இருக்கிறது

என்று வலுக்கட்டாயமாக

காட்டுகிறது ; பார்க்கவைக்கிறது.

மொத்தமாக,

உண்மை எரிச்சலூட்டுவது.

(translation of a paragraph from "Conversation with the God" written by Neale Donald Walsch)

காலவோட்டம்

ஒடிக்கொண்டிருக்கிறான்.
அவன் இலக்கு எதிர்காலம்.
அவன் சுயகற்பனையில்
கவிதைகளில் படித்ததில்
இலட்சிய கனவுகள்
கண்டவர்களின் உரைகளில்
எதிரகாலம் அழகாக
சித்தரிக்கப்பட்டிருந்தது.
எனவே தான் அவன் ஒட்டம்
எதிர்காலத்தை தேடி.
இறந்த காலத்தை தாண்டி
வந்துவிட்டதை
நினைவு மைல் கற்கள்
தெரியப்படுத்தின.
வெகுநேரம் ஓடியும்
நிகழ்காலம் முடிந்தபாடில்லை.
சலிப்பில்லாமல்
தேடி தேடி
ஓடினான்.
நிகழ்காலத்தின்
ஒரு புள்ளியிலேயே
அவன் ஓட்டம் முற்றுப்பெற்றது.

ராஜினாமா

Resignationவெளியேறும்

எண்ணம் வந்தது.

இருக்கையிலிருந்து

எழ முயலும்போது

கை கட்டப்பட்டது

பொன் விலங்கோ?

மஞ்சள் நூலோ?

பொருட்படுத்தாமல்

கையை உதறி

எழுகையில்

அழுகை சத்தம்.

போகாதே !

என்னை விட்டு போகாதே !

மேலதிகாரியின்

குரலென அறிவதற்கு

கொஞ்ச நேரம் பிடித்தது.

எங்களை விட்டு போகாதே

இது அதிகாரியின் அதிகாரி.

சபாஷ்!

எல்லாருக்கும்

நான் எழும் சத்தம் கூட

தெளிவாக கேட்கிறது.

என் குரல் பழையபடி

கேட்க முடியாதவாறு

இவர்கள் செவிகள்

மீண்டும் பழுதுபடுமுன்

இங்கிருந்து விலகுதல் சிறந்தது.

ஓர் உண்மையின் கதை


ஒளித்துவைக்கப்பட்டிருந்த
உண்மையொன்று
வெளிவர முயன்றது.
வாசலை
சார்த்தி வைத்திருந்தார்கள்
உண்மையை சித்திரவதை செய்து
அறையில் அடைத்துவைத்தவர்கள்.
உடைத்து திறக்க
ஆயுதமேதும் அகப்படவில்லை.
தலையை முட்டி மோதி
திண்டாடி தடுமாறி
வந்தது வெளியே.
யாரும் அடையாளம் கண்டுகொள்ளவில்லை.
எங்களில் ஒருவன் போல் இல்லையே! என்று சொல்லி
நிராகரித்தன பொய்கள்.
உண்மைக்கு பசித்தது.
உயிர் போகும்படி பசி.
நீதி மன்றத்தில்
நீதிபதிகள் சோறிட்டு
உண்மையின் உயிரை
காப்பாற்றுகிறார்கள் என்று கேள்விப்பட்டு
விரைந்தது.
உணவருந்திக்கொண்டிருந்த நீதிபதி
வக்கீலும் துணைக்கு
வந்து சோறு கேட்டால் மட்டுமே
சோறளிக்கும்
சட்டவிதியை விளக்க
உணவு இடைவேளைக்கு பிறகு
சந்திக்க சொன்னார்.
காவலாளி
பலவந்தமாய்
உண்மையை வெளியே அழைத்துப்போனான்.
நாவுலர்ந்தது உண்மைக்கு.
ஒளிபரப்பு கருவிகளோடு நின்றிருந்த
தொலைகாட்சி நிருபரொருவர்
யார் எனக்கேட்டார்.
அறிமுகம் தந்ததும்
சுவாரஸ்யம் இழந்தார்.
அவர் அனுதாபிக்க
வேறு வகை உண்மையை
அழைத்து வருமாறு
இந்த அப்பாவி உண்மையை
வேண்டினார்.
உண்மை போல தோற்றமளிக்கும்
பொய் கூட பரவாயில்லை அவருக்கு.
உண்மை மயக்கமுற்றது
அரசு மருத்துவமனையில்
விழித்தெழுந்தது
யாரோ தண்ணீர் தெளித்தபோது.
வெள்ளைக்குல்லா வெள்ளை சட்டை அணிந்த ஒருவர்
எலுமிச்சை சாறு தந்து கைகூப்பினார்.
குடித்தவுடன்
உண்மை மீண்டும் மயக்கமடைந்தது
எலுமிச்சை சாற்றில் கலப்படம்
உண்மையும் கொஞ்சம் கலப்படமானது.
சத்தம்போட துடங்கிய உண்மையின்
வாயை அடைக்க
வெள்ளைகுல்லா மனிதர்
தன் உறவினரென்று
உண்மைக்காக பொய்சொல்லி
ஐசியு-வில் படுத்துக்கொள்ள வைத்தார்.
அங்கே கிடைத்த
சிசுருஷையில்
பசி விலகி
ஆரோக்கியம் பெற்றது
இப்போது யாரும்
நீ யாரென்று கேட்பதில்லை
உண்மைக்கு அடையாளம் வந்துவிட்டது
பொய்கள் போல் அழகுடன் காட்சியளிக்க
பிளாஸ்டிக் அறுவை சிகிச்சையும் செய்துகொண்டது.

அறையிருட்டு

எஞ்சியிருந்த மெழுகுவர்த்தி சுடரை

காற்றின் உதவியுடன் புகையாக்கி

ஒளியை விழுங்கியது

அறையிருட்டு.

மனிதவிழிகள் கூட

தனது ஓட்டைகளை

பார்க்க முடியாதென

கர்வம் கொண்டது.

தனது சுயசொரூபத்தை

முழுக்க உணரும்

வேட்கையில்

சன்னலுக்கு

வெளியே படர்ந்திருந்த

பேரிருட்டின் அங்கமானது.

பேரிருட்டு விரியும் திசைக்கு

மாற்றுதிசையில்

பேரிருட்டுப்பாதையினூடே

விரைந்து பறந்தது.

+++++

சில ஆயிரம் மைல்கள் தூரத்தில்

பேரிருட்டின் எல்லை முடிந்தது.

எலலையற்ற தன்மையை

அனுபவமாய் உணரும் பேரார்வத்தில்

சூரியவொளி ஆக்கிரமித்திருந்த

நிலப்பரப்பில் நுழைந்தவுடன்

அறையிருட்டின் ஒருபகுதி

பஸ்மமானது.

வந்த வழி உடன் திரும்பி

பேரிருட்டின் பாதையூடெ

அறைக்கு மீண்டு வர எத்தனிக்கையில்,

சூரியவொளியின் நீளும் கரங்களில் சிக்கி

பேரிருட்டுடன் சேர்ந்து

அறையிருட்டு கரைந்துபோனது.

+++++

பேரிருட்டின் ஆவியுடல்

சரண் புகுந்த ஏதொவோர் இடத்தினிலேயே

அறையிருட்டின் ஆவியுடலும்

அகதியானது.

பேரொளியின் ஆட்சி ஒய்ந்தபின்

மீண்டும் உயிர்க்கும் போது

அறையிருட்டையும் உயிர்ப்பித்து

அதன் அறையில் சேர்த்துவிடுவதாக

பேரிருட்டு வாக்களித்தது.

+++++

குறை போக்கி அருள்


முடிதிருத்தும் நிலையத்தில்
நன்கு தூக்கம் வருகிறது.
திரையரங்குகளிலும்.
தேர்வு எழுதும் அறைகளில்
திறம்பட.
கோவில்களில் மணியோசை
தாயின் தாலாட்டு போலவே ஒலிக்கிறது.
ரயிலின் புறப்பாட்டுக்கு காத்திருக்கும்போது துடங்கி
சேருமிடம் வரும்வரை
சயனம்தான்.
வேலை செய்யுமிடத்தில்
மதியவுணவுக்குப்பின் வரும் கொட்டாவி
பிறருக்கு தெரியாமலிருத்தல்
பிரம்மப்ரயத்தனந்தான்.
மகளின் பள்ளியில்
ஆசிரியர்களை சந்திக்க
காத்திருக்கும் பொழுதுகளில்
குழந்தைகள் பாடும் தமிழ்த்தாய் வாழ்த்து
திருப்பள்ளிஎழுச்சியாகும்.
இரவு எத்தனிக்கும்போது மட்டும்
தூக்கம் காணாமல் போய்விடுகிறது.
புத்தகம் படித்தாலும்
காதுக்குள் வைத்து
கைத்தொலைபேசியில் வானொலி கேட்டாலும்
போர்வையால் கால் முதல் தலைவரை போர்த்தி
இருட்டில் கண்ணை அகல விரித்து
தூக்கத்திற்காக காத்திருந்தாலும்.
வருவதில்லை…!
தூக்கம் வர ஏதாவது மந்திரம் இருக்கிறதா?
மனைவியின் காற்றுநிறை குறட்டை சத்தத்தை
கவனமுடன் கேட்கிறேன்.
த்யானம் செய்வது போல.
தேவியருள் புரிந்தாள்.

மொட்டின் வாசம்

ஒரு கோட்டை வீழ்ந்த
வெற்றியை கொண்டாடிக்கொண்டிருக்கும்போது
கைப்பற்றாத கோட்டைகளை
எண்ணத்தொடங்கினான்
எண்ணிக்கை முடியும் முன்னரே
வீழ்ந்த கோட்டையை வேறு யாரோ
எடுத்துக்கொண்டனர்
மன்னன் இன்னும் எண்ணிக்கொண்டிருக்கிறான்
கம்பிகளையும் நாட்களையும்
+++++
வரப்போகும் மனைவியின்
புகைப்பட உருவிற்கு
முடிவிலா முத்தங்கள்
நிச்சயதார்த்தம் முறிந்தது
மனைவியாகப்போகிறவள்
வேறுயாருக்கோ நிஜத்தில்
முத்தம் கொடுத்தாளாம்.
இவனுக்கு வேறு புகைப்படம் கிடைத்தது
இவனின் முத்தங்கள் தொடர்கின்றன
+++++
இலக்கை முதலில் அடைந்துவிடும்
வெறியில்
பாதை தாண்டி ஓடிவிட்டான்
பந்தயத்திலிருந்து விலக்கிவிட்டார்கள்
அடுத்த பந்தயம் நடக்க
நாட்கள் பிடிக்கும்
நகத்தைக்கடித்து நகத்தைக்கடித்து
காத்திருந்ததில்
ஓடுவது மறந்துவிட்டது