புத்தரும் நாத்திகமும்

நாத்திகம் என்பது கடவுள் அல்லது கடவுளர் மீது நம்பிக்கை வைக்காமல் இருப்பது தான் என்றால் நிச்சயம் பெரும்பான்மையான பௌத்தர்கள் நாத்திகர்களே. ஆனால் பௌத்தம் என்பது கடவுள் மீது நம்பிக்கை வைப்பதை அல்லது வைக்காமல் இருப்பதைப் பற்றியதல்ல. கடவுளரை நம்புதல் நிர்வாண நிலையை அடைய விரும்புவோருக்கு பயன் தரும் விஷயமன்று என்று சாக்கியமுனி போதித்தார். வேறு மாதிரி சொல்வதாக இருந்தால், பௌத்தத்தில் கடவுள் என்பவர் தேவையற்றவர், ஏனெனில் பௌத்தம் ஒரு நடைமுறை தத்துவம் ; தெய்வ நம்பிக்கையை, ஐதீகங்களை விட, நடைமுறை விளைவுகளையே அதிகம் வலியுறுத்தும் சமயம். இக்காரணத்தால், பௌத்தத்தை துல்லியமாக வர்ணிப்பதென்றால் non-theistic என்று தான் சொல்ல வேண்டும். Atheistic என்றல்ல.

புத்தரே தாம் கடவுளல்ல என்றும் முக்தி நிலையை எட்டியவர் மட்டுமே என்றும் சொல்லியிருக்கிறார். எனினும் ஆசியாவெங்கும் புத்தரையோ பல்வேறு பௌத்த தொன்ம கடவுளரையோ வழிபடுதல் பரவலாக காணப்படுகிறது. புத்தரின் ரெலிக்குகள் உள்ளதாகக் கருதப்படும் ஸ்தூபங்களை யாத்திரீகர்கள் மொய்க்கிறார்கள். பௌத்தத்தின் சில உட்பிரிவுகள் ஆழமான பக்தியை வலியுறுத்துபவை. பக்தியை வலியுறுத்தாத தேரவாதத்திலும் ஜென்னிலுமே கூட நமஸ்கரித்தலையும், பூ, பழம், ஊதுபத்தி போன்றவற்றை புத்தர் திருவுருவத்திற்கு படைத்தலையும் உள்ளடக்கிய சடங்குகள் உண்டு.

நம்மால் கண்டுணர முடியாத யதார்த்தத்தில் விழித்தெழுதலை நோக்கிய பாதை பௌத்தம். பல்வேறு பௌத்தப்பிரிவுகளில், நிர்வாணம் அல்லது முக்தி எந்த கருத்தாக்கத்துக்கும் உட்படாதது ; சொற்களால் விவரிக்க முடியாதது. அவற்றை புரிந்து கொள்ளும் ஒரே வழி அவ்வனுபவத்தை பெறுவது மட்டும் தான். வெறுமனே நிர்வாணத்தை முக்தி நிலையை நம்புதல் பயனற்றது.

பௌத்தத்தில் அனைத்து நெறிமுறைகளும் தற்காலிக பயனளிப்பவையென்றே கருதப்படுகின்றன. செயல்திறத்தின் அடிப்படையிலேயே அவைகள் தீர்மானிக்கப்படுகின்றன. சமஸ்கிருதத்தில் இது “உபாயா” (skilful means) என்று அழைக்கப்படுகிறது. நிர்வாணத்துக்கு வழிவகுக்கும் எந்த நெறிமுறையும் வழிமுறையும் உபாயா என்று கொள்ளப்படும், அந்த நெறிமுறை உண்மையானதா இல்லையா என்பது அர்த்தமற்றது.

கடவுளரில்லை, நம்பிக்கைகள் இல்லை, இருந்தாலும் பௌத்தம் பக்தியை ஊக்குவிக்கிறது. இது எப்படி?

முக்தியை அடைவதற்கு மிகப்பெருந்தடையாய் இருப்பது ‘நான்’ என்பது நிரந்தரமான, சுயேச்சையான வஸ்து என்று எண்ணுவது. சுயம் என்னும் மயக்கத்தை விட்டொழிக்கும் போது முக்தி நிலை துளிர் விடுகிறது. சுயச்சங்கிலியை உடைத்தெறிய பக்தி ஓர் உபாயம். இதன் காரணமாகவே பக்தி பூர்வ, மற்றும் மரியாதை பூர்வ மனப்பழக்கத்தை வளர்த்துக் கொள்ளுமாறு புத்தர் போதித்தார். ஆகவே, பக்தி பௌத்தத்தின் திரிபு அன்று ; வெளிப்பாடு.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s